निर्देशक दिनेश राउतको नयाँ प्रेम कथानक नेपाली फिल्म ‘कुमारी’ ले आफ्नो पहिलो अफिसियल गीत ‘कता छौ मेरो फूल’ सार्वजनिक गरेको छ । गीत सार्वजनिकसँगै निर्माण टिमले फिल्मको रिलिज मिति पनि घोषणा गरेको छ । ‘कुमारी’ आगामी माघ २३ गते (फेब्रुअरी ५) मा देशभर प्रदर्शनमा आउने भएको छ । रिलिज मिति ‘भ्यालेन्टाइन डे’ नजिक परेकाले फिल्मले युवा दर्शकलाई विशेष लक्ष्य लिएको बुझिन्छ ।
यसअघि टुँडिखेलमा भव्य रूपमा आयोजना गरिएको घोषणा कार्यक्रममा यो गीतको लाइभ प्रस्तुति गरिएको थियो, जसले सामाजिक सञ्जालमा ठुलो चर्चा बटुलेको थियो । गायक केहर सिंह लिम्बु तथा उनको ब्यान्ड ‘केहर एन्ड द लुङ्गा’ले प्रस्तुत गरेको यो गीत हाल युट्युब र टिकटकमा विशेष गरी ‘जेन-जी’ (Gen-Z) पुस्ताबिच निकै लोकप्रिय बन्दै गएको छ ।
फिल्मका मुख्य कलाकारफिल्मको मुख्य भूमिकामा अबिषेक खड्का र आकृति राजभन्डारी रहेका छन्। दुवै कलाकार यसै फिल्ममार्फत मुख्य भूमिकामा डेब्यु गर्दै छन् । उनीहरूसँगै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनीषा शर्मालगायतका कलाकार पनि फिल्ममा देखिनेछन् ।
फिल्म ‘आइ एम सरी’बाट निर्देशन यात्रा सुरु गरेका राउत ‘नोभेम्बर रेन’ र ‘क्लासिक’ जस्ता सफल प्रेमकथाका फिल्मका लागि चिनिन्छन् । पछिल्ला वर्षहरूमा सामाजिक विषयमा केन्द्रित फिल्म निर्देशन गर्दै आएका राउतले दर्शकको रुचिअनुसार फेरि प्रेमकथामा फर्किएको बताएका छन् । उनका अनुसार ‘कुमारी’को प्रोजेक्ट ‘पुजार सार्की’भन्दा अघि प्रारम्भ भए पनि विभिन्न कारणले अहिले आएर मात्र बनेको हो ।
फिल्मका सम्पूर्ण गीतमा केहर सिंह लिम्बूले स्वर दिएका छन् । यसमा केहरसँगै सुमन तामाङ र प्रशान्त सिवाकोटीको सङ्गीत रहेको छ । बिनिश इन्टरटेन्मेन्ट र पिक्चर फ्रेमको सहकार्यमा निर्माण भएको यस फिल्मका निर्माता महेन्द्र अधिकारी हुन् । कार्यकारी निर्माताको भूमिकामा केदार भुसाल रहेका छन् । यसमा विकास सुवेदीको लेखन, सुशन प्रजापतिको छायांकन सुप्रिम पराजुलीको रङ्ग संयोजन, उत्तम न्यौपानेको साउण्ड डिजाइन, किरण थापा र शिशिर खातीको नृत्य निर्देशन रहेको छ ।