नायिका वर्षा सिवाकोटीले फिल्म ‘छक्का पन्जा ५’मा काम गर्ने पक्का भएको छ । निर्माणपक्षले सिवाकोटीसँग केही दिन अगाडि फिल्मका लागि साइन गरेको वुझिएको छ । यो फिल्मका हरेक सिरिजमा नयाँ नयाँ नायिका अनुवन्धित हुँदै आएका छन् ।
यसपटक भने वर्षाले ब्लकबस्टर फिल्मको पाँचौ सिरिजमा काम गर्ने पक्का भएको हो । यो फिल्मको आज शुभसाइत समेत हुँदैछ । भक्तपुरको सूर्यविनायक मन्दिरमा यो फिल्मको शुभसाइत गर्दै निर्माणपक्षले छायांकन सुरु गर्न लागेको हो ।
फिल्मलाई असोजको २४ गतेबाट रिलिज गर्ने पक्का भएको समेत निर्माणपक्षले जानकारी दिएको छ । फिल्ममा दीपक शर्मा र बाबुल गिरीको संगीत, दीपकराज गिरीको कथा, हरि हुमागाँइको छायांकन रहनेछ । फिल्मलाई पोखरा, काठमाडौं र नुवाकोटमा छायांकन गरिनेछ ।
फिल्मको छायांकन ५० दिनमा सक्ने योजना निर्माणपक्षको छ । यसपटक कलाकार तथा लेखक दीपकराज गिरीले राजनीतिक कथावस्तु भन्दा केही पर रहेर सामाजिक कथावस्तुमा फिल्म बनाउने तयारी गरेका छन् ।
दीपाश्री निरौलाले निर्देशन गर्ने फिल्ममा दीपकराज गिरी, केदार घिमिरे र वर्षा सिवाकोटी पक्का भएका छन् । यो बर्षकै प्रतिक्षित रुपमा रहेको फिल्म ‘छक्का पन्जा ५’ले ऐतिहासिक रेकर्ड राख्ने अपेक्षा गरिएको छ ।