काठमाडौं । माग्ने बुढा अर्थात् केदारप्रसाद घिमिरेको निर्देशनमा टेलिभिजन कमेडी शो ‘कमेडी हब’ निर्माण हुने भएको छ । वैशाख अन्तिमदेखि एपीवान टेलिभिजनबाट शो प्रसारण हुने जनाइएको छ ।
शोमा माग्ने बुढासहित कमेडी च्याम्पियन सिजन १ का विजेता हिमेश पन्त, कमेडियनहरु राजा राजेन्द्र, खड्गबहादुर पुनमगर (खबपु) र सुबोध गौतमले कमेडी कला प्रस्तुत गर्ने भएका छन् ।
मंगलबार शोको आधिकारिक पोस्टर सार्वजनिक गर्दै वैशाख अन्तिमदेखि एपीवान टेलिभिजनबाट शो प्रसारण हुने जनाइएको छ ।
शोमा कमेडीका ६ शैली प्योर, ह्युमर, रोमान्टिक, स्ट्यान्ड अप, सटायरिक र प्यारोडी प्रस्तुत गरिने पोस्टरमा उल्लेख छ ।
६ महिनासम्म प्रसारण हुने योजनाअनुसार एसिपोड छायांकन सुरु भएको छ भने शो तीन सिजनसम्म सञ्चालन गर्ने लक्ष्य रहेको छ । शोका कन्टेन्ट निर्देशन माग्ने बुढा र प्राविधिक निर्देशन भने जनकदीप पराजुलीले गरिरहेका छन् ।
वैशाख अन्त्यदेखि प्रसारण लक्ष्य राखिएको शोका दुई भागको छायांकन सकिएको छ ।