अभिनेता राजेश हमालको कमब्याक फिल्म ‘नरसिंहाः अवतार’ नयाँ वर्षको छेको पारेर चैत्रको २९ गतेबाट रिलिजमा आउने चर्चा थियो । उसो त, यसको निर्माणपक्षले यही मितिमा आउने आधिकारिक घोषणा गरेको थिएन ।
अब, यो फिल्म चैत्र २९ मा नआउने भएको छ । राजेश हमाललाई ठूलो पर्दामा हेर्ने दर्शकको चाहना यो वर्ष पनि पुरा नहुने पक्का भएको छ । यो फिल्मलाई अर्को वर्षको जेठमा ल्याउने संभावना उच्च रहेको वुझिएको छ ।
दिवाकर भट्टराइको निर्देशनमा तयार भएको यो फिल्ममा राजेश हमालको साथमा राज कटुवाल, सरोज खनाल, उषा खड्गी, नीति शाह, सनिसा भट्टराई लगायतका कलाकारहरुको अभिनय छ ।
फिल्म ‘नरसिंहाः अवतार’लाई एक्सन र प्रेम कथामा निर्माण गरिएको छ । दर्शकले फिल्मबाट पूर्ण मनोरञ्जन प्राप्त गर्ने विश्वास निर्देशक भट्टराइको छ ।
अभिनेता हमाल पनि चैत्र २९ मा फिल्म रिलिज गर्न इच्छुक नदेखिएको वुझिएको छ । एकसाथ एउटै मितिमा तीन फिल्म रिलिज हुँदा बक्स अफिसमा असर पर्ने देखेर पनि यसको निर्माणपक्षले केही समयलाई प्रदर्शन मिति पोष्टपोन्ड गरेको हो । फिल्मको हाल पोष्ट प्रोडक्सनको काम चलिरहेको छ । फिल्मको काम नसकिनु पनि पोष्टपोन्डको अर्को कारण हो ।