केही फिल्ममा सह–नायिकाको रूपमा काम गरेकी नायिका परीक्षा लिम्बुले ‘सोल्टिनी’बाट मुख्य नायिकाको रूपमा उदाउने ठूलो मौका पाएकी थिइन्। नायक प्रकाश सपुतसँगको जोडीमा बनेको यो फिल्म उनी वरिपरि नै केन्द्रित भएकाले परीक्षाले यसबाट ठूलो आशा राखेकी थिइन्।
तर, भाइटिकाको दिनबाट प्रदर्शनमा आएको ‘सोल्टिनी’ले अपेक्षित शोज पाउन सकेन। दर्शकको उपस्थिति न्यून रह्यो भने समीक्षामा पनि फिल्मले सुखद प्रतिक्रिया बटुल्न सकेन। समीक्षक र दर्शक दुवैको नजरमा फिल्मको कथा र प्रस्तुति कमजोर ठहरियो।
फिल्ममा परीक्षाको अभिनयप्रति अपेक्षा गरिएको भए पनि उनको प्रदर्शनले विशेष चर्चा पाउन सकेन। फलस्वरूप, नायिकाको रूपमा आफूलाई स्थापित गर्ने उनको पहिलो प्रयास असफल रह्यो। यसले आगामी परियोजनामा उनलाई मुख्य नायिकाका रूपमा लिने निर्णयमा पनि निर्माताहरूलाई सतर्क बनाएको देखिन्छ।
यद्यपि, परीक्षाको आगामी फिल्मी लाइनअप भने उत्साहजनक छ। उनले हालै ‘हिमालयन गोल्ड’ नामक नयाँ फिल्म साइन गरेकी छिन्, जसमा नायिका मेनुका प्रधान पनि सह–अभिनेत्रीका रूपमा देखिनेछिन्। सार्वजनिक तस्बिरहरूले पनि परीक्षा नै फिल्मको मुख्य भूमिकामा रहेको पुष्टि गर्छन्।
त्यस्तै, उनले ‘पोखरेली मसिनो’ नामक अर्को फिल्ममा पनि अभिनय गरेकी छिन्। यी दुवै परियोजनामा परीक्षा मुख्य नायिकाको रूपमा प्रस्तुत हुँदैछिन्। त्यसैले, उनका लागि अवसर अझै खुला छन्। तर, पहिलो प्रयास ‘सोल्टिनी’बाट भने उनलाई ठेस लागेको स्पष्ट देखिन्छ।