नेपाली चलचित्र क्षेत्रका चर्चित अभिनेता तथा निर्देशक रमित ढुंगाना शोकमा डुबेका छन्। उनकी ८८ वर्षीया आमा ज्ञानुदेवी ढुंगानाको आइतबार बिहान निधन भएको हो। स्वास्थ्यमा अचानक गम्भीर समस्या देखा परेपछि शनिबार साँझ ललितपुरको पुल्चोकस्थित सुमेरु सिटी अस्पतालमा भर्ना गरिएकी उनको उपचारकै क्रममा बिहान ५ बजे निधन भएको हो।
रमितका निकट मित्र तथा म्युजिक भिडियो निर्देशक रोजल थापाले दिएको जानकारीअनुसार, स्वर्गीय ज्ञानुदेवीको अन्त्येष्टि आजै (आइतबार) दिउँसो हिन्दू धार्मिक परम्पराअनुसार काठमाडौंको पशुपति आर्यघाटमा गरिँदैछ। अन्तिम संस्कार गर्नुअघि बिहान १० बजेदेखि ११ बजेसम्म उनको पार्थिव शरीरलाई अन्तिम श्रद्धाञ्जलीका लागि आर्यघाट परिसरमै राखिने व्यवस्था मिलाइएको छ।
अभिनेता ढुंगाना आफ्नी आमासँग निकै आत्मीय र नजिकको सम्बन्धमा थिए। उनका सामाजिक सञ्जालका पानाहरू हेर्ने हो भने आमाप्रतिको अगाध प्रेम प्रष्ट झल्किन्छ। आमासँगै विभिन्न स्थानमा घुम्न गएका र अस्पतालमा उपचार गराइरहँदाका पलहरूलाई उनले आफ्ना शुभचिन्तकमाझ निरन्तर साझा गर्दै आएका थिए। आमाको कमजोर स्वास्थ्य अवस्थाकै कारण रेखदेखमा समय दिनुपर्ने भन्दै रमितले पछिल्लो समय प्राप्त थुप्रै चलचित्रका प्रस्तावहरूलाई समेत अस्वीकार गरेका थिए।
पछिल्लो समय रमितले आफ्नै निर्देशनमा चलचित्र ‘नमेटिने घाउ’ दर्शकमाझ ल्याएका थिए। यद्यपि, बक्स अफिसमा उक्त चलचित्रले सोचेअनुरूपको व्यावसायिक सफलता भने हात पार्न सकेन। प्राप्त जानकारीअनुसार उनी यसै वर्ष नयाँ चलचित्र निर्माणको तयारीमा रहेका छन्।