काठमाडौं । सरकारले फागुन १ गतेदेखि सिनेमा हल खोल्ने निर्णय गरेसँगै फिल्म निर्माताहरुले रिलिज मिति तय गर्न थालेका छन्। यसैबीच, फिल्म ‘चिसो मान्छे’को नयाँ प्रदर्शन मितिसहित पोस्टर सार्वजनिक गरिएको छ।
लेखक तथा निर्देशक दीपेन्द्र के खनालले आगामी असार ३ गते फिल्म रिलिज हुने फेसबुक मार्फत जानकारी दिएका छन्।
यसअघि यो फिल्म आगामी बैशाख ३० गते रिलिज हुने तय भएको थियो। तर, सरकारले बैशाख ३० गते स्थानीय तहको निर्वाचन घोषणा गरेसँगै प्रदर्शन मिति सारिएको हो।
सार्वजनिक पोस्टरमा स्वस्तिमा खड्काको फरक अवतार देख्न सकिन्छ। यस फिल्ममा स्वस्तिमाको शीर्ष भूमिका रहेको छ। साथै, अर्पण थापा, देशभक्त खनाल, आशान्त शर्मा, झकेन वीसी लगायतका कलाकारको अभिनय रहेको छ।
शर्मिला पाण्डेको लगानी रहेको फिल्ममा दिपेन्द्र के खनालको लेखन, छायाङ्कन र निर्देशन रहेको छ। फिल्मको सुटिङ काठमाडौं, बाजुरा लगायतका स्थानमा गरिएको थियो। फिल्ममा बाजुराको भाषा समेत समावेश गरिएको छ।
खनालले यसअघि फिल्म ‘प्रशुपति प्रसाद’ र ‘आमा’ समेत बनाएका थिए। जुन फिल्महरु व्यावसायिक र समीक्षात्मक रुपमा सफल भएका थिए।