फिल्म ‘केटी हराएको सूचना’को छायांकन सुरु भएको छ ।
दीपेन्द्र गौचनको लेखन तथा निर्देशनमा बन्न लागेको यो फिल्मको केही दिन अघि स्क्रिप्ट पूजा गर्दै मुख्य कलाकारको बारेमा जानकारी गराइएको थियो । यो फिल्ममा गौचनकै लेखन छ ।
फिल्ममा अभिनेता नाजिर हुसेन र अभिनेत्री सृष्टि श्रेष्ठको जोडी बाँधिने भएको छ । उनीहरूले पहिलो पटक एकसाथ काम गर्न लागेका हुन् ।
एक महिनाको छायांकन सेड्युल तय गरिएको फिल्मको काठमाडौँमा तीन दिन सुटिङ गरेर मंगलबारदेखि टोली धनुषा तर्फ प्रस्थान भएको छ ।
अम्बर महर्जन छायाकार रहेको फिल्मको बाँकी छायांकन जनकपुरका विभिन्न क्षेत्रमा हुने बताइएको छ ।
ट्राई सिटी पिक्चर्सको ब्यानरमा निर्माण हुन लागेको फिल्मको निर्माता नकिम उद्दिम हुन् । यसअघि उनले ‘द म्यान फ्रम काठमाडौँ’, ‘सुन्तली’, ‘सानो संसार’ र ‘कागबेनी’ फिल्मको पनि निर्माण गरिसकेका छन् । उद्दिम ५ वर्षपछि फिल्म निर्माणमा फर्किएका हुन् ।
यो फिल्मलाई सन् २०२४ मै प्रदर्शन गर्ने लक्ष्य राखिएको छ । निर्माता उद्दिनले फिल्मको व्यावसायिक प्रदर्शन आफूहरूको उद्देश्य रहेको बताएका छन् ।
निर्देशक गौचनले करिब तीन दशक अगाडि बालविवाहको विषयमा टेलिसिरियल ‘उजेली’ निर्देशन गरेका थिए । उनी क्याम्बोडियन नागरिक हुन् । उनले केही क्याम्बोडियन फिल्मको निर्देशन तथा निर्माण पनि गरेका छन् ।
नायक नाजिर हुसेनको ‘अगस्त्य’ हलमा रिलिज भइरहेको छ । यस्तै, सृष्टिले फिल्म ‘११ः५५’को छायांकन केही साता अगाडि सकाएकी छिन् ।