‘रङ्गेली’का निर्देशक अर्जुन सुवेदीले आफ्नो दोस्रो निर्देशकीय फिल्म ‘सोल्टिनी’ रिलिजभन्दा अगावै नयाँ फिल्मको निर्माण घोषणा गरेका छन् । उनको निर्देशनमा बन्न लागेको फिल्मको नाम ‘कन्यादान’ राखिएको छ । उनले हरितालिका तिजको अवसर पारेर मंगलबार थिम पोस्टर सार्वजनिक गर्दै फिल्मबारे जानकारी गराएका हुन् ।
ट्राइडेन्ट कन्सेप्टका रोयल भीमसेनले तयार पारेको पोस्टर वैचारिक डिजाइनमा आधारित छ । पोस्टरमा देखाइएको एक विधवा महिलाको सांकेतिक तस्वीरले नेपाली समाजमा विधवाले भोग्ने मौन पीडा र पुनः जीवनप्रतिको चाहना दुवैलाई प्रतिबिम्बित गर्छ ।
यो फिल्ममा विधवा महिलाको जीवन र समाजले दिने चुनौतीलाई पर्दामा उतारिने जनाइएको छ । फिल्मको सार ‘हरेक विधवाले दोस्रो अवसर पाउनुपर्छ‘ भन्ने रहेको निर्देशक सुवेदीले बताए । उनका अनुसार समाजका कडाइ र परम्परागत मान्यतालाई चुनौती दिँदै दोस्रो ‘कन्यादान’ प्राप्त गरी पुनः प्रेम र जीवन जिउने अधिकार दिने प्रसंग यसमा देखाइनेछ ।
कुमार भट्टराई र अर्जुन सुवेदीको संयुक्त लेखन रहेको फिल्मलाई आगामी वर्ष रिलिज गर्ने लक्ष्य लिइएको छ । फिल्मको निर्माणमा प्लानेट थ्री फिल्म्सले गर्नेछ भने सुभकाशा पिक्चर्स र ट्राइडेन्ट कन्सेप्टको सहकार्य रहनेछ । फिल्मको प्रस्तुतकर्तामा रेजिना बिस्ट र कार्यकारी निर्मातामा मार्टिन ओली रहेका छन् ।
यो फिल्मको छायाङ्कन निर्देशनमा सुसन प्रजापति र सङ्गीतकारमा प्रशान्त सिवाकोटी रहनेछन् । यसअघि ‘कन्यादान’ शीर्षकमा दुईवटा फिल्म बनिसकेका छन् । ती फिल्मभन्दा सुवेदीको निर्देशनमा बन्ने ‘कन्यादान’को कथा फरक रहेको जनाइएको छ ।