News

‘जलाकी’ बाट बाहिरिए धीरज, उपासनाको जोडी बने सोनम

dhiraj magar upasana sing thakuri and sonam topden
dhiraj magar upasana sing thakuri and sonam topden

नेपाली फिल्ममा कलाकार हेरफेर हुनु सामान्य मानिन्छ । छायांकन भइरहँदा समेत कलाकार फेरिने गर्छन् । तर, फिल्म ‘जलाकी’को हकमा भने कलाकार फेरबदलको प्रक्रिया रोचक देखिएको छ । २०८१ सालको चैतमा फिल्मको शुभ मुहूर्त गर्दा मुख्य अभिनेताको रुपमा सोनम तोप्देन थिए । अभिनेत्री उपासना सिंह ठकुरीसँग जोडी बाँध्ने गरी उनलाई फिल्ममा लिइएको थियो ।

तर, मुहूर्तपछि लामो समय छायांकन नहुँदा सोनम अर्को फिल्म ‘ऐरी’मा जोडिए । यो फिल्मको छायांकनको क्रममा उनी खुट्टा भाँचिएर घाइते भएपछि ‘जलाकी’का निर्माताले उनलाई विशेष भूमिकामा राख्दै धीरज मगरलाई मुख्य भूमिकामा अनुबन्धित गरे । तर, यसपछि पनि ११ महिनासम्म छायांकन हुन सकेन । जसले गर्दा फिल्ममा फेरि कलाकार हेरफेर भएका छन् ।

सोनम पूर्ण रुपमा निको भएसँगै उनलाई ‘जलाकी’मा पुरानै भूमिकामा फर्काइएको छ भने धीरज फिल्मबाट बाहिरिएका छन् । उनी सहमतिमै फिल्मबाट अलग भएको जनाइएको छ । सोनम मुख्य भूमिकामा फर्किएसँगै करिब ९ दिनदेखि कास्कीका विभिन्न ठाउँमा फिल्मको छायांकन भइरहेको छ । यसका निर्देशक अशोक थापा मगर हुन् ।

मगर समुदायको कथामा आधारित यस फिल्ममा सोनम र उपासनासहित साहारा हाङमा लिम्बू, शिल्पा मास्के, माओत्से गुरुङ, बुद्धि तामाङ, अस्तित्व भट्टचन, खड्क बहादुर पुन (खबपु) लगायतको पनि अभिनय रहनेछ । फिल्मका निर्माताहरूमा ओम घर्ति मगर, बिर बहादुर लामा, चन्द्र बहादुर भट्टचन, बेताने मगर, मान बहादुर धनाह मगर र सुस्मिता बुढाथोकी रहेका छन् ।

Share

यो खबर पढेर तपाईंलाई कस्तो महसुस भयो ?

० Comments