‘दुर्गा’ बनाउँदै सम्राट

सम्राट बस्नेतले नयाँ फिल्म निर्माणको घोषणा गरेका छन् । निर्देशक बस्नेतले फिल्म ‘दुर्गा’ निर्देशन गर्न लागेका हुन् ।

थिम पोस्टर सार्वजनिक गर्दै उनले फिल्म निर्माणको घोषणा गरेका हुन् । थिम पोस्टरमा दुर्गा मन्दिर अगाडि उभिएकी एक युवती छिन् । मन्दिरको ढोका अगाडि उनी एक्लै उभिएकी छन् ।

मन्दिरको ढोका अगाडि त्रिशूल छ । फिल्मको नाम ‘दुर्गा’ हुनु र त्रिशूलअगाडि बच्चा उभिएको देखिनुले यी दुईबीच केही सम्बन्ध रहेको अनुमान लगाउन सकिन्छ ।

नामले यो फिल्मको मुख्य पात्र दुर्गा रहेको प्रस्ट संकेत गरेको छ । फिल्म महिलाप्रधान रहेको पनि अनुमान लगाउन सकिन्छ । मन्दिरमा रातो कलरको अधिकता र युवतीले पनि रातो नै कलरको लुगा लगाएको देखाइनुले फिल्ममा हत्या वा हिंसा प्रचुरमात्रामा रहेको बुझ्न सकिन्छ ।

तर, फिल्मको दुर्गाको हो भनेर जानकारी दिइएको छैन । कलाकार र प्राविधिक टिमबारे निर्माण टोली मौन रहेको छ । “चाँडै नै हामी फिल्मका मुख्य कलाकारबारे जानकारी दिने छौँ । केही कलाकार अडिसनबाट छान्ने हाम्रो तयारी  छ,” निर्देशक बस्नेतले भने, “फिल्म मिथोलोजिकल हुनेछ ।”

कुस्मंडा र ग्लोबल रिल मोसन पिक्चर्सको ब्यानरमा बन्ने फिल्मको कथा निश्चल ढुंगानाले लेखेका छन् ।  

९० दिन छायांकन सेड्युल रहेको फिल्म काठमाडौं, पोखरा र चितवनमा खिचिनेछ । असोजको पहिलो साताबाट चलचित्र छायांकनमा जानेछ ।

पछिल्लो समय निर्देशक बस्नेतको निर्देशन रहेको फिल्म ‘लाखे’ रिलिज भएको थियो । यो फिल्मको केही दिन अगाडि मात्रै युट्युब रिलिज गरिएको थियो ।