News

सौरभ चौधरीले ‘द राइज अफ साम्राज्य’ निर्देशन गर्ने, छायांकन भदौदेखि

image 10
image 10

२०८० सालमा प्रदर्शन भएको ‘अगस्त्य’बाट एक्सन फिल्म निर्देशनमा राम्रो सम्भावना देखाएका सौरभ चौधरीले आफ्नो नयाँ फिल्म ‘द राइज अफ साम्राज्य’को निर्माण घोषणा गरेका छन् । उनले सोमबार थिम पोस्टर सार्वजनिक गर्दै फिल्मबारे जानकारी गराएका हुन् । आगामी भदौबाट पूर्वको कोशी ब्यारेक क्षेत्रमा छायांकन हुने फिल्म अहिलेसम्मकै ठूलो क्यानभासमा बन्ने जनाइएको छ ।

फिल्मको थिम पोस्टरमा आगोको लप्कासँगै घोडामा सवार मानिसहरू देखिएका छन् । पोस्टरको माथिल्लो र बायाँ भागमा उडिरहेको रातो झण्डाले क्रान्ति वा विद्रोहको संकेत गरेको छ । त्यस्तै, पृष्ठभूमिमा केही व्यक्तिहरू मञ्चमा रामलीला नाटक प्रहसन गरिरहेका देखिन्छन्, जसले फिल्मको कथा कुनै कालखण्डमा आधारित रहेको बुझाउँछ ।

डार्क हर्स इन्टरटेन्मेन्टको प्रस्तुति रहने फिल्मको निर्मातामा प्रवेश चौधरी र निला देव रहेका छन् । सह-निर्मातामा विश्वास बस्नेत (बेन) र कार्यकारी निर्मातामा शंकर पाण्डे छन् । ‘कर्नाली ब्लुज’ र ‘फिरफिरे’ जस्ता उपन्यासका लेखक बुद्धिसागरले फिल्मको स्क्रिप्ट लेखेका हुन् । मानकृष्ण महर्जनको छायांकन रहने फिल्मको दुई चरणमा गरी ७० दिन छायांकन हुनेछ ।

सह-निर्माता बस्नेतले ‘द राइज अफ साम्राज्य’ नेपाली फिल्म उद्योगकै ठूलो स्केलको ‘एपिक एक्सन ड्रामा’ फिल्म हुने बताए । उनले भने, ‘यो फिल्म लाइनअप र मेकिङको हिसाबले नेपाली फिल्म उद्योगको अहिलेसम्मकै बिग स्केलको फिल्म हुनेछ । यसको कथा पनि एकदमै फरक छ ।’ उनका अनुसार आगामी सातादेखि फिल्मका मुख्य कलाकारहरूको नाम सार्वजनिक गरिनेछ ।

Share

यो खबर पढेर तपाईंलाई कस्तो महसुस भयो ?

० Comments