‘तक्मे बुढा’को रुपमा परिचित कलाकार विल्सन विक्रम राईले आफ्नो निर्माण तथा निर्देशनमा बन्न लागेको फिल्म ‘मैझारो’मा कलाकारको लाइनअप बलियो बनाएका छन् । गत साता फिल्मको घोषणा गरेयता उनले धीरज मगर, मिरुना मगर, सुनिल थापा, पुष्कर गुरुङलाई अनुबन्धित गरिसकेका छन् ।
अब अर्की अभिनेत्री दीया पुनको फिल्ममा प्रवेश भएको छ । शनिबार निर्देशक राईले उनलाई औपचारिक रुपमा अनुबन्ध गरेका हुन् । ‘वीर विक्रम’बाट अभिनेत्रीको रुपमा डेब्यु गरेकी दीयाको पछिल्लो फिल्म ‘दयारानी बक्स अफिसमा हिट भएको थियो । ‘मिस्टर झोले’, ‘मन्त्र’ जस्ता फिल्ममा पनि काम गरेकी उनको नयाँ फिल्म ‘एक्लो’ आगामी पुषमा रिलिज हुँदैछ ।
तक्मे प्रोडक्सनको ब्यानरमा निर्माण हुन लागेको ‘मैझारो’ पूर्वी पहाडको जीवनशैली, संस्कृति र सामाजिक यथार्थतामा आधारित भएर बन्ने जनाइएको छ । आगामी साउन पहिलो साताबाट छायांकन सुरु हुने भनिएको फिल्मलाई पूर्वी जिल्ला इलाम र पाँचथरका रमणीय स्थानहरूमा खिचिनेछ ।
सौरभ लामाले छायांकन गर्ने फिल्ममा संगीत अनमोल गुरुङ र तोरेम्पा हाङ राईले दिनेछन् भने गीतमा राजेश पायल राई, अस्मिता अधिकारी, झुमा लिम्बू र अनमोल गुरुङको स्वर रहनेछ । फिल्ममा निर्देशक राई स्वयंको लेखन रहेको छ ।