लोकप्रिय लोकदोहोरी गायिका विष्णु माझीको तीज गीतले सधैं नै चर्चा पाउँछ । विष्णु माझीको गीत नआएसम्म तीज नै आएन भन्नेहरू पनि छन् । उनै, माझीको स्वरमा समावेश ‘म त नराउरी’ बोलको तीज गीत सार्वजनिक भएको छ । ‘पुतलीको भट्टी–२१’ अन्तर्गत यो तीज गीत सार्वजनिक गरिएको हो ।
करिब १४ मिनेट लामो यो गीतमा सुन्दरमणि अधिकारीको शब्द तथा संगीत छ । सुन्दर मणीकै निर्माण तथा निर्देशनमा तयार भएको तीज गीतमा मौसम हिमालीको कोरियोग्राफी छ । प्रवीण भट्टको सम्पादन रहेको भिडियोमा ललिता पौडेलले अभिनय गरेकी छिन् । सार्वजनिक गीतले छोरा र छोरीबिचको भेदभावलाई उठान गरेको छ ।
गीतमा दाजुभाइले मीठो मसिनो खादा, बाबु आमाको साथ पाउँदा आफूले नपाएको भन्दै एक चेलीको पीडा पोखिएको छ ।
गायिका माझी गुमनाम छिन् । उनको स्वर मात्र श्रोताले सुन्न पाउँछन् । उनी हरेक वर्ष तीजमा एउटा गीत सार्वजनिक गर्छिन् । गायिका माझी किन यसरी लामो समयदेखि गुमनाम छिन् भन्ने कसैलाई पनि थाहा छैन ।
तर, उनको तीज गीतले भने सधैं नै हंगामा मच्चाउँछ । सार्वजनिक भएसँगै सामाजिक संजालमा यो तीज गीतको चर्चा सुरु भएको छ ।